अयोध्या-वृत्तसंस्था | पंतप्रधान नरेंद्र मोदी यांनी आज आपल्या अयोध्या दौर्‍यात येथील अयोध्या धाम रेल्वे स्थानकाचे लोकार्पण करण्यासह सहा वंदे भारत आणि दोन अमृत भारत ट्रेनला हिरवा झेंडा दाखवला.
नरेंद्र मोदी आज अयोध्या दौर्‍यावर आले असता त्यांचे अतिशय जल्लोषात स्वागत करण्यात आले. त्यांनी अयोध्या धाम रेल्वे स्थानकावरून ६ वंदे भारत आणि २ अमृत भारत एक्सप्रेस गाड्यांना हिरवा झेंडा दाखवला. यासोबतच २४० कोटी रुपये खर्चून बांधलेले अयोध्या धाम स्थानकही जनतेला समर्पित करण्यात आले आहे.
याप्रसंगी पंतप्रधानांसह उत्तर प्रदेशचे मुख्यमंत्री योगी आदित्यनाथ, केंद्रीय रेल्वेमंत्री अश्विनी वैष्णव, उत्तर प्रदेशच्या राज्यपाल आनंदीबेन पटेल यांच्यासह अनेक बडे नेते उपस्थित होते. रेल्वेसोबतच अयोध्यावासीयांना नवीन अयोध्या धाम रेल्वे स्थानकाची भेट मिळाली आहे. त्याचे बांधकाम तीन टप्प्यात सुरू आहे. या स्थानकाच्या उभारणीचे पहिल्या टप्प्याचे काम पूर्ण झाले आहे. हे रेल्वे स्टेशन २४० कोटी रुपये खर्चून बांधण्यात आले असून, त्याचे उदघाटन आज पंतप्रधान मोदींच्या हस्ते झाले.
अयोध्या धाम हे स्टेशन बाल संगोपन केंद्र, आजारी लोकांसाठी स्वतंत्र केबिन, पर्यटक माहिती केंद्र, तसेच देशातील सर्वात मोठे कॉन्कोर्स सेटअपसह बांधले जात आहे. तेथे एक शिशु देखभाल कक्ष असेल जेथे महिला प्रवासी त्यांच्या स्तनपान करणार्‍या मुलांसाठी कोणत्याही प्रकारची वैद्यकीय तपासणी करू शकतील. त्याचप्रमाणे प्रवासादरम्यान कुणालाही दुखापत झाल्यास किंवा कोणत्याही प्रकारची समस्या आल्यास आजारी कक्षात प्रथमोपचार आणि वैद्यकीय उपचाराचीही सोय आहे.
त्याचबरोबर प्रवासी सुविधा डेस्क आणि पर्यटन माहिती केंद्राच्या मदतीने येथे येणार्‍या प्रवाशांना श्री राम मंदिरासह परिसरातील प्रत्येक अध्यात्मिक आणि पर्यटन स्थळांना भेटी देण्याबाबत तसेच तेथे पोहोचण्यासाठीच्या साधनांची माहिती मिळू शकणार आहे. . या सर्व सुविधा तळमजल्यावर असतील.
याशिवाय या रेल्वे स्थानकात क्लोक रूम, फूड प्लाझा, वेटिंग हॉल, जिना, एस्केलेटर, लिफ्ट आणि टॉयलेटसह अनेक सुविधा उपलब्ध करून देण्यात येणार आहेत. अयोध्या धाम स्थानकाच्या मधल्या मजल्यावर रिटायरिंग रूम, लेडीज डॉर्मेटरी, एसी रिटायरिंग रूम, जेंट्स डॉर्मेटरी, जिना, आराम कर्मचार्‍यांसाठी लॉजिंग रूम, स्टेशन मास्टर आणि महिला स्टाफ रूम बनवण्यात आली आहे.
याशिवाय पहिल्या मजल्यावर फूड प्लाझा, वेटिंग हॉल, टॉयलेट, पिण्याचे पाणी, एस्केलेटर, लिफ्ट, स्टाफ रूम, दुकाने, वेटिंग रूम आणि एंट्री ब्रिज आदी सुविधा उपलब्ध करून देण्यात येणार आहेत. दिव्यांगांसाठी अनेक विशेष प्रकारची स्वच्छतागृहेही तयार करण्यात आली आहेत. अयोध्या रेल्वे स्थानकाचे बांधकाम २०१८ पासून सुरू करण्यात आले होते.
Leave a Reply